ആലപ്പുഴ> പതിനൊന്നുകാരിയോട് ലൈംഗികാതിക്രമം കാണിച്ച കേസിൽ 69 കാരന് പന്ത്രണ്ടു വർഷം കഠിന തടവും പിഴയും. മുഹമ്മ താമരപള്ളി മോഹൻദാസി(69) നെയാണ് ആലപ്പുഴ സ്പെഷ്യൽ പോക്സോ കോടതി ജഡ്ജി ആഷ്കെ ബാൽ ശിക്ഷിച്ചത്. 12 വർഷം കഠിനതടവിനു പുറമേ 70,000- രൂപ പിഴഅടയ്ക്കണം. പിഴയടയ്ക്കാത്ത പക്ഷം ഒരു വർഷം കൂടുതൽ തടവ് അനുഭവിക്കണം. പിഴയടച്ചാൽ തുകയിൽ 50,000 രൂപ കുട്ടിക്ക് നഷ്ടപരിഹാരമായി നൽകണമെന്നും വിധിച്ചു.
മുഹമ്മ പോലീസ് 2017 ൽ രജിസ്റ്റർ ചെയ്തതാണ് കേസ്. കുട്ടി പഠിത്തത്തിൽ ഏകാഗ്രത കാണിക്കാതിരുന്നത് ശ്രദ്ധിച്ച അദ്ധ്യാപകർ കൂട്ടിയോടു കാര്യങ്ങൾ ചോദിച്ചറിഞ്ഞതിനെ തുടർന്നാണ് സംഭവം പുറത്തറിയുന്നത്. തന്റെ കടയിൽ വച്ചാണ് പ്രതി കുട്ടിയെ ഉപദ്രവിച്ചിരുന്നത്. പ്രോസിക്യൂഷനു വേണ്ടി സ്പെഷ്യൽ പബ്ലിക് പ്രോസിക്യൂട്ടർ എസ് സീമ ഹാജരായി.
