കണ്ണൂര്: പ്രസ്സ് ക്ലബില് അതിഥിയായി എത്തി കണ്ണൂര് വാരിയേഴ്സ് ഫുട്ബോള് ക്ലബ്. കണ്ണൂര് പ്രസ്സ് ക്ലബ് ഒരുക്കിയ ചടങ്ങില് കണ്ണൂര് വാരിയേഴ്സ് എഫ്സി മുഖ്യപരിശീലകന് മാനുവല് സാഞ്ചസ്, ക്യാപ്റ്റന്മാരായ സി കെ ഉബൈദ്, ഏണസ്റ്റീന് ലവ്സാംബ, അറ്റാക്കിംങ് താരം മുഹമ്മദ് സിനാന് എന്നിവരാണ് അതിഥിയായി എത്തിയത്. കണ്ണൂരിലേക്ക് ഫുട്ബോള് മടങ്ങിയെത്തിയതില് സന്തോഷമുണ്ടെന്നും സ്വന്തം ആരാധകര്ക്ക് മുന്നില് രണ്ടാം സീസണില് കളിക്കാന് സാധിച്ചത് അഭിമാനമായി കാണുന്നുവെന്നും കണ്ണൂര് വാരിയേഴ്സ് മുഖ്യപരിശീലകന് മാനുവല് സാഞ്ചസ് പറഞ്ഞു. മികച്ച ടീമിനെ തന്നെയാണ് മത്സരത്തിനൊരുക്കുന്നത്. കഴിഞ്ഞ സീസണിനെ അപേക്ഷിച്ച് സൂപ്പര് ലീഗ് കൂടുതല് മികച്ചതായി മാറിയിരിക്കുകയാണെന്ന് മാനുവല് സാഞ്ചസ് പറഞ്ഞു.
ഇന്ത്യന് താരങ്ങളുടെ നിലവാരം മികച്ചതാണ്. കഴിഞ്ഞ സീസണെ അപേക്ഷിച്ച് അവരുടെ മെന്റാലിറ്റിയില് വളരെ അധികം മാറ്റങ്ങള് വന്നിട്ടുണ്ട്. ഓരോ ദിവസവും അവരുടെ കളി മെച്ചപ്പെടുന്നു. പക്ഷെ അവരെ ആരും ശ്രദ്ധിക്കപ്പെടുന്നില്ല. വരുന്ന സീസണില് കളിക്കാന് എത്തുന്ന വിദേശ താരങ്ങളും വളരെ അധികം പരിശ്രമിക്കേണ്ടിവരും. ഇന്ത്യൻ താരങ്ങളില് നിന്നും ഞങ്ങള്ക്ക് പലകാര്യങ്ങളും പഠിക്കാന് സാധിച്ചെന്ന് ക്യാപ്റ്റനും കാമറൂണ് താരവുമായ ഏണസ്റ്റിന് ലവ്സാംബ പറഞ്ഞു. കഴിഞ്ഞ വര്ഷം നഷ്ടപ്പെട്ട കിരീടം തിരിച്ചുപിടിക്കാന് വേണ്ടിയാണ് ഇത്തവണ ഇറങ്ങുന്നത്. ടീമിലെ എല്ലാവരും കഠിനപരിശ്രമത്തിലാണെന്ന് ഉബൈദ് കൂട്ടിചേര്ത്തു. കണ്ണൂര് പ്രസ്സ് ക്ലബ് പ്രസിഡണ്ട് സി.സുനില്കുമാര് അധ്യക്ഷത വഹിച്ച ചടങ്ങില് സെക്രട്ടറി കബീര് കണ്ണാടിപറമ്പ സ്വാഗതവും സ്പോര്ട്സ് കണ്വീനര് ഷമീര് ഊര്പ്പള്ളി നന്ദിയും അറിയിച്ചു.
