കണ്ണൂർ :വിദ്യാലയ മികവുകള് കണ്ടെത്തുന്നതിനായി സംസ്ഥാനത്തെ ലിറ്റില് കൈറ്റ്സ് യൂണിറ്റുകള്ക്ക് വീഡിയോ നിർമ്മാണ പരിശീലനത്തിനായി പ്രത്യേക റീൽസ് മത്സരം നടത്തുന്നു. “എൻ്റെ സ്കൂൾ എൻ്റെ അഭിമാനം” എന്നതാണ് റീൽസ് മത്സരത്തിൻ്റെ വിഷയം. സ്കൂളിന്റെ മികവ്, വ്യത്യസ്തമായ പ്രവർത്തനങ്ങൾ, അക്കാദമിക് മാതൃകകൾ, ലഭ്യമായ അടിസ്ഥാന സൗകര്യങ്ങളുടെ വിനിയോഗം തുടങ്ങിയവയാണ് വിഷയമാക്കേണ്ടത്. തിരഞ്ഞെടുക്കുന്ന 100 റീലുകള്ക്ക് 5,000 രൂപ വീതം സമ്മാനം ലഭിക്കും. ആങ്കറിങ്, ഇന്റര്വ്യൂകൾ തുടങ്ങിയവയെല്ലാം കുട്ടികൾ തന്നെയാവണം നിർവഹിക്കേണ്ടത്. ലിറ്റില് കൈറ്റ്സ് യൂണിറ്റുകളാകും ഇതിന് മുൻകൈയ്യെടുക്കുന്നത്. സ്വന്തം സ്കൂളിന് പുറമെ സമീപ പ്രദേശത്തെ സ്കൂളുകളെയും റീൽസ് എടുക്കുന്നതിന് തിരഞ്ഞെടുക്കാവുന്നതാണ്. ഇതിൽ എൽപി – യുപി സ്കൂളുകൾക്കാണ് മുൻഗണന നൽകേണ്ടത്. ഒരു സ്കൂളിനെക്കുറിച്ച് 90 സെക്കന്റില് കൂടാത്തവിധം വേണം റീലുകള് തയ്യാറാക്കേണ്ടത്. റീലുകൾ സ്കൂളിന്റെ സാമൂഹിക മാധ്യമ പേജിൽ (ഇന്സ്റ്റഗ്രാം, ഫെയ്സ്ബുക്ക്) പോസ്റ്റ് ചെയ്ത് കൈറ്റ് വിക്ടേഴ്സ് ചാനലിനെ ടാഗ് ചെയ്യണം. #എന്റെസ്കൂൾഎന്റെഅഭിമാനം, #MySchoolMyPride, #victerseduchannel എന്നീ ഹാഷ്ടാഗുകളില് വേണം അവരവരുടെ പേജില് പോസ്റ്റ് ചെയ്യാൻ. വെർട്ടിക്കലായി വേണം ഷൂട്ട് ചെയ്യാൻ.
തിരഞ്ഞെടുക്കുന്ന റീലുകൾ കൈറ്റ്-വിക്ടേഴ്സ് ചാനലിൽ സംപ്രേഷണം ചെയ്യും. ഇതിനോടൊപ്പം വിക്ടേഴ്സ് ചാനലിന്റെ 8714323499 എന്ന വാട്സ്ആപ്പ് നമ്പറിലേക്ക് റീലുകള് അയയ്ക്കേണ്ടതാണ്. പ്രത്യേക ജൂറി ആയിരിക്കും മികച്ച റീലുകളെ തിരഞ്ഞെടുക്കുക. കൈറ്റ് ജില്ലാ ഓഫീസുകള്/കൈറ്റിന്റെ വെബ്സൈറ്റ് മുഖേന ലഭ്യമാക്കുന്ന എൻഡ് കാർഡ് ആയിരിക്കണം വീഡിയോയുടെ അവസാനം ഉപയോഗിക്കേണ്ടത്. റീല്സുകള് സമര്പ്പിക്കേണ്ട അവസാന തീയതി ഒക്ടോബര് 9.
ഇത് സംബന്ധമായ വിശദമായ വിവരങ്ങള് കൈറ്റിന്റെ വെബ്സൈറ്റില് (www.kite.kerala.gov.in) ലഭിക്കും.
